يا ولد معقول لسة فيك إيمان
معقول عندك أمل
دخلك ما قتلك الملل
لا تحكيلي وطن عربي بقى
ولا تحكيلي عروبة
عم نعيش بصعوبة
وأصحابنا اختاروا الغربه
وبعدك بتقول وطن
ليش وين كان الوطن لما مات جارك
وين كان الوطن لما انقتل مختارك
وين كان الوطن كل هالأيام
هو في وطن
أو فكرة عالخاطر
إلي فيه هو حزن
والمبسوط شاطر
والمسكين معتر إله يبكي
وما إله قوه يشكي
بدك تقنعني إنه في وطن
وطن ونحنا بكل هالمحن
يا ولد خلص نام
وبلا ما تحلم
صار في ضريبه عالحلم
وضريبه عالهوا
وضريبه عالوجع
يا ولد…فجأة سكت الولد
اطلع فيي وحكي
قال كلمه سكتتني
قال لي
يا ولد الوطن ما بيكره
الوطن بيمرض
وطنك مريض
وطنك امك
في حدا بيترك امه وهي مريضة
سكتت..وكسرت المرايه…

عمر الكردي